यी हुन् लालबाबुलाई सरसफाईका लागि सडकमा उतार्ने १८ वर्षे युवक

पूर्वमन्त्री एवं एमाले सांसद लालबाबु पण्डित, काठमाडौं महानगरकी उपमेयर हरिप्रभा खड्गी लगायतको एक समूह बिहीबार बिहानै तीनकुने चोकमा झाडूसहित देखियो ।सामान्य प्रशासन मन्त्रालयमा हुँदा प्रशासन क्षेत्रको विकृति हटाएर चर्चामा आएका पण्डितसहितको जमात हातमा झाडू बोकेर काठमाडौंको सफाइमा जुटेको थियो । उनलाई साथ दिन काठमाडौंकी उपमेयर खड्गीसहित दर्जनौं विद्यार्थी र सुरक्षाकर्मीहरु सडकमा जम्मा भएका थिए ।धुलोले आक्रान्त भएको काठमाडौंको सरसफाईमा लालबाबुुसहित सयौंको सहभागिता आखिर कसरी जुट्यो ? सरसफाइमा स्वतस्फूर्त रुपमा संलग्न भएका अधिकांश व्यक्तिहरुलाई समेत यो कार्यक्रमबारे जानकारी थिएन । धेरैलाई लाग्यो, यो कुनै एनजीओको कार्यक्रम होला ।

हामीले कार्यक्रमका आयोजकबारे खोजी गर्‍यौं । वास्तवमा लालबाबुलाई सडकमा उतार्ने काम गरेका रहेछन्- सदुरपश्चिमका १८ वर्षे युवक केपी खनालले ।कार्यक्रम आयोजकका बारेमा कुरा गर्दै एमाले सांसद पण्डिलले भने,- ‘एक जना १७/१८ वर्षका युवा रहेछन् । उनको नेतृत्वमा रहेको क्लिन काष्ठमान्डप भन्ने संस्थाले सरसफाई कार्यक्रममा मलाई आमन्त्रण गरेको थियो । त्यसैले सरसफाई कार्यक्रममा पुगेको हुँ ।’‘म बदलिन्छु, मेरो देश बदलिन्छ’ भन्ने नारासहित युवाले सुरु गरेको अभियानलाई आफूले साथ दिएको पण्डिले बताए ।

को हुन् केपी खनाल ?
सुदुपश्चिमको अछाम जिल्लास्थित रामारसम गाउँपालिका घर भएका खनालले कक्षा १२ सम्मको अध्ययन कैलालीबाटै पूरा गरे । उनी अहिले नेपाल कमर्स क्याम्पस, बानेश्वरमा बीबीएस तहमा अध्ययरत छन् । उनी क्लीन काष्ठमान्डप नामक संस्थाका अध्यक्ष हुन् ।यिनै खनालकै अगुवाइमा बिहीबार कोटेश्वरदेखि माइतीघर मण्डलासम्म सडक सरसफाइ गरिएको हो । अयिभानमा साथ दिन बागमती, चक्रपथ र मनहरा सरसफाई अभियानका अभियान्ताहरु समेत सडकमा निस्किएका थिए ।

सदुरपश्चिमको गरिब परिवारमा हुर्किएका केपी ०६८ सालमा १२ वर्षको हुँदा ‘गरिब विद्यार्थी बाल क्लब’ मा आवद्ध थिए । बाल क्लबबाट सुरु भएको उनको सामाजिक कार्यको अभियान क्रमशः झांगिँदै गयो । उनले बाल क्बलमा आवद्ध भएकै वेला कैलालीको एक स्थानीय एफएममा बाल कार्यक्रमसमेत चलाए ।एसईई परीक्षापछि बचेको ३ महिने छुट्टीमा उनले केही समय भारतमा गएर श्रमसमेत गरे । पछि उनी विभिन्न सामाजिक संघसंस्था एवं एनजीओहरुमा समेत आवद्ध भए ।

यसअघि उनले नेपालगञ्जको बागेश्वरी मन्दिरमा समेत सरसफाइ कार्यक्रम गरिसकेका छन्, जहाँ उनलाई नेपालगञ्जका मेयर र उपमेयरले समेत साथ दिएका थिए ।खनालले टीकापुरको लप्कीचुवा नगरपालिका र धनगढी उपमहानगरपालिकामा समेत सरसफाई अभियान सञ्चालन गरिसकेका छन् ।यस वर्षको दशैंमा उनले गरिब परिवारका लागि सहयोगस्वरुप सामाजिक सञ्जालबाट ‘दशा लागेकालाई यो दशैं’ शीर्षकमा अभियान चलाएर ४ दिनको अवधिमा २ लाख रुपैयाँ सङ्कलन गरी गरिब परिवारलाई खाद्यान्न तथा अन्य विभिन्न आवश्यक सामाग्री वितरण गरे ।तिहारको समयमा ‘भोकै छ जुम्ला’ भन्ने अभियान सुरु गरेका खनालले १ लाख ५० हजार रुपैयाँ सङ्कलन गरी त्यहाँका स्थानीयलाई सहयोग गरे । विद्यालय विदा भएको मौका पारेर उनी कैलालीबाट हुम्लातर्फ हिँडे ।हुम्लाको आरामचुली गाउँपालिकामा ९ दिनको यात्रापछि पुगेर उनले २५ गरिब घरपरिवारलाई राहत सामग्री वितरण गरेका थिए ।